Kulturealáhus deaivvadeapmi Riddu Riđđus
Sáhttá go sámi kultuvrra geavahit boastut go vuovdá iežas buktagiid, ja gii mearrida mii lea rievttes dahje boastut geavaheapmi? Dát jearaldagat leat guovddážis sámi kulturealáhus deaivvadeamis Olmmáivákkis suoidnemánu 8. Beaivvi.
-Mii vuordit miellagiddevaš ságastallama das makkár ovddasvástádus sámi kulturealáhusain lea kulturárbbi ektui, lohká Davvi álbmogiid guovddáža prošeaktajođiheaddji Per-Johannes Marainen.
-Sámi kulturealáhusat sáhttet šaddat okta sámi deháleamos ealáhussan. Dát ealáhus rahpá vejolašvuođa olbmuide orrut maiddai árbevirolaš sámi guovlluin, ja seammás ovdánahttit sámi kultuvrra ja kulturárbbi, lohká Per-Johannes Marainen.
Muhto seammás dovdet máŋgasa ahte lea váttis diehtit mot sáhttá ávkkástallat sámi kultuvrra iežaset gálvvuid vuovddidettiin.
Váillahit ságastallama ealáhusa árvvuid birra
-Oallugat lohket lea ahte menddo unnán sáhka sámi kultuvrra birra dán oktavuođas. Sii váillahit mihá eambbo ságastallat iežaset ealáhusa árvvuid birra, ja danin jáhkkit ge ahte lea stuora dárbu dákkár deaivvadeapmái, lohká Marainen.
Elin Kåven lea okta seminára logaldalliin, ja son jearrá mot kulturealáhusat sáhttet geavahit sámi máidnasiid ja muitalusaid? Mot dát sáhttá váikkuhit sámi kultuvrra?
Elin lohká iežas váillahan ságastallamiid das makkár vejolašvuođat ja čuolmmat leat sámi kulturealáhusain sámi kulturovddasvástádus mielddisbuktá.
Semináras biddjo ollu áigi gaskaneaset ságastallamii ja ságastallan fáttat leat e.e.
- Mot sáhttá kulturealáhusbargi šaddat oadjebas sámi kulturárbbi ektui?
- Mat leat sámi kulturealáhusaid stuorámus hástalusat?
- Makkárat livžžu čovdosat?
- Mot sáhttá Kultursiida bargat viidásabbo kulturealáhus ovdánahttimiin?
Kultursiida lea dán deaivvadeami váldolágideaddji. Dán searvvi váldomihttu lea ovdánahttit sámi kulturealáhusaid. Kultursiida vuođđudeaddjit leat Davvi álbmogiid guovddáš, Riddu Riđđu ja ovttaskas kulturealáhusbargit
Sámediggi lea miel-lágideaddji.