Maŋemus jagiid lea Balto šaddan guovddáš jietnan sámi ja norgga musihkkalávddis. Son lea čalmmustahttán iežas buorrin gaskkusteaddjin iežas nana jietnaovdanbuktimiin ja sániiguin. Su lávlagat, jietna ja gaskkusteapmi leat addán sutnje buori beaggima sihke sis- ja olgoriikkas.
Mii leat lihkolaččat go leat máŋgii beassan vásihit Balto Riddu Riđu váldolávddis, ja dát leat álo fámolaš ja duohtadovddu konseartavásáhusat mat guoskkahit gehččiid.
Dál son boahtá Olmmáivággái lávlagiiguin su juovlaskearrus «Sámi juovllat», mainna lea ožžon buriid árvvoštallamiid. Vuosttaš sotnabeaivvi adveanttas 2024:s beasai son vuosttaš sámi artistan doallat juovlakonseartta Operas ovttas KORK:in. Dát šattai liekkus, fámolaš ja guoskkaheaddji konsearta, mii sihke vuvddii visot váldolávddis ja maid NRK báddii ja čájehii.
