Jagi 2025 festivála guosselogut leat sajis
Go dán jagi festivála loahpahuvvui sotnabeaivvi suoidnemánu 13.b. čuovganeapmái ledje 6149 olbmo fitnan min festiválas.
«Mii leat hui duhtavaččat sihke ilmmiin, gussiiguin ja maiddái daiguin buriiguin ságastallamiiguin mat šadde go olbmot, gielat ja kultuvrrat gávnnadedje. Váldolávdeprográmma lea sihke hirpmahuhttán, buktán kvaliteahta ja addán gussiide vásáhusaid maid dáidet guhká muitit. Ollu prográmmačuoggát ledje áibbas dievva, ja mokta vuhttui olles vahkku », dadjá festiválajođiheaddji Sajje Solbakk.
Dán jagi festiválas lei garra politihkalaš profiila, lávdeságastallamiiguin Sámedikki jienastuslogu birra, debáhtain mii lei dán jagi sámediggeválggaid guovtti njunuš evttohasa gaskkas ja konseartačájálmasain ja diŋgojuvvon bihtáin «The Arctic is not for sale». Váldolávddis ledje mis ollu hui čeahpes artistat geat adde ollu čáppa konseartavásáhusaid gussiide.
«Lea váttis namuhit dušše ovtta dáhpáhusa deháleamosin, muhto lea gal juoga maid háliidan čalmmustahttit čeavláivuođain, namalassii dán jagi vuoruheami Mánáidfestiválii, Manne ja Mánát nammasaš diŋgojuvvon bihtá. Lea mearrideaddji sámi mánáide oažžut dovdduide čuohcci sámi kulturvásáhusaid, ja vásihit iežaset giela ja identitehta alla dását dáidaga bokte. Festivála čájeha fas ahte Riddu Riđđu lea eanet go festivála, dat lea gávnnadanbáiki eamiálbmogiidda, lávdi dehálaš ságastallamiidda ja fápmoguovddáš sámi kultuvrii», dadjá festiválajođiheaddji.