ISÁK ja A Tribe Called Red jagi 2021 Riddu Riđđui

Bileahttavuovdin boahtte jagi Riddu Riđđu festiválii lea rahppon, ja vuosttaš 100 festiválapássa vuovdit hálbbiduvvon haddái. Go festivála lágiduvvo ávvojagis 2021,  de leat gehččiid jiellahat, namalassii ISÁK ja A Tribe Called Red, gergosat doallat riemuid lávddi nalde.

ISÁK-joavku almmuha ođđa álbuma 2021:s ja sii bohtet ge maiddái Riddu Riđđui. Sii leat beaggán go ráhkadit lávdečájálmasaid mat leat buoremus dásis, alimus alvameriin. Ovddit háve go ISÁK lei Riddu Riđđus, de ovdanbukte borggisteaddji konseartta gealdašuvvan guldaleddjiide, geat dál besset illudit go nástejoavku máhccá Gáivutnii ávvudit festivála 30-jagi ávvudeami. Musihkas seaguhit luođi ja urbána syntha lyrihkalaš cealkámušaiguin, maid gaskkustit sihke sámegillii ja eŋgelasgillii.

Kanadalaš eamiálbmotjoavku A Tribe Called Red lea dovddus erenoamáš artisttalaš dovddaheami geažil, mas árbevirolaš ja ođđaáigásaš eamiálbmotmusihkka lea guovddážis. Ieža čilgeba musihkaska seaguhussan ođđaáigásaš hip-hopas, árbevirolaš pow wow-rumbbuin ja -jienain, buvttaduvvon edgy elektronika vugiin. Ovddit háve go A Tribe Called Red galledii Riddu Riđđu, de dagaheigga joavkolahtut mearehis movtta riddugiettis gierdodánsumiin ja visuálalaš beavttuiguin. Čieža jagi maŋŋil dien lihkostuvvama lea ATCR vuot gearggus bovdestit Riddu-gussiid riemuide.

Festiválajođiheaddji Sandra Márjá West lea hui duhtavaš boahtte jagi festivála vuosttaš artistaalmmuhemiin:

“Riddu Riđđu deavdá 30 jagi 2021:s ja lea illu bovdet guovtti Riddu-álbmoga jiellatjoavkkuin ruovttoluotta ávvudit festivála. ISÁK lea ovdamearkan das go nuorra sápmelaččat čevllohallet iežaineaset, ja ahte sis lea juoga dieđihit. Dat han lei ge mii oalgguhii Riddu Riđđu álggaheami – olbmot dáppe háliidedje ahte nuorra sápmelaččat galge leat rámis iežaineaset.”

FUOM! Ovdagihtii oastán bileahtaid ovddas oažžu ruđa máhcahuvvot jus festivála ii lágiduvvo.