Golbma ođđa joavku gergosat Riddu Riđđui 2015
Sámi juoigan ja americana, Ruonáeatnanlaš indie ja suopman rocka Riddu Riđus 2015.
Juoigan ja americana ođđa duos
Joavku Arvvas lea ođđa musihkalaš ovttasbargu juoigi Sara Marielle Gaup Beaska ja bassista ja lávlu Steinar Raknes gaskkas. Ovttas ráhkadeaba musihka mii vuolgá jazzas, juoigamis ja americanas. Sara Marielle seaguha boares juoiganvuogi ja ođđaáigásaš musihka ja Steinar Raknes lea Norgga čeahpimus bassistačuojaheaddjiid ja lávluid gaskkas. Guktot leaba ovdal čuojahan rámiduvvon sámi.
– Go gulaimet ođđa guovtti nu hárjánan musihkkára ovttasbarggu birra go Steinara ja Sara Marielle guoktq, de diđiimet dakkaviđe ahte heiveba juste Riddu Riđđui. Nu čilge festiválahoavda Karoline Tveitnes Trollvik preassadieđáhusastis.
Festiválii boahtá Arvvas dievas čuojahanjoavkun.
Čájeha iežas identitehta
Jagi 2010 Kalaallit Nunaata dahje Ruonáeanan-joavku «Nanook» čuojahii vuosttaš geardde Riddu Riđus, ja energiijaineaset ja ságaideasetguin illudahtte guldaleddjiid Riddus. Dál boahtá joavku fas Riddui. Joavku lea aitto almmuhan ođđa skearru, man musihkkaárvvoštallit sakka rámidit.
– «Nanook» lea viežžan duvdosiid Kalaallit Nunaata luonddus ja birrasis. Identitehta lea dehálaš bártniide ja sii lávlot eatnigillii, muitala Trollvik.
Davvi-norgalaš suopmanrocka
Festiválii boahtá maid nuorra joavku «Resirkulert», mii lea válljejuvovn čuojahit by:Larmas njukčamánus. Sin musihkka muittuha eará davvi-norgalaš artisttaid, nugo Kråkesølv ja Moddi.
– Mii illudit ovdanbuktit Omasvuona joavkku iežamet stuora lávddis. Dál lea joavku duođai gearggus dasa! Min mielas lea somá go čállet lávllateavsttaid iežaset suopmana mielde. Olbmot sáhttet vuordit movttegis rocka dáin nuorra taleanttain, dadjá festiválahoavda Karoline Tveitnes Trollvik.
– Čuojahit Riddu lávddis leamaš min niehku ja mihtomearri dan rájes go álggaheimmet. Viimmat mii beassat dan dahkat, dadjá čuojaheaddji Jonas Nilsen.