Gildojuvvon sáttomeahcceblues Riddu Riđđui!
Musihkka bággejuvvo olggos Malis, muhto lihkos Riddu Riđus lea sihke sadji ja lávdi gos Mali joavku Tamikrest beassá čuojahit!
Gieldá musihka
Tamikrest ruovtturiikkas Malis lea dál soahti ja oaguheapmi mii lea dagahan ahte hui ollu musihkkarat leat báhtaran riikkas. Soahpatmeahttunvuođa oanehis oassi čilge oanehaččat dálá dili Malis: Ođđajagimánus guokte jagi áigi čuožžilii stuibmi tuarega álbmoga gaskkas riikka davimus oasis. Oanehis áiggi maŋŋil dan, de Davvi-Mali julggaštuvvui iešheanalaš riikan, ja gohččoduvvui Azawad. Iešguđetge islámalaš joavkkuid gaskkas lea dál sihke moivi ja nággu, go háliidit čađahit garra sharia, isláma lága, dien guovllus. Dán moivvis lea dál nu ahte musihkadoaimmaheapmi lea hui várálaš, ja maiddái gildojuvvon. Malis lea badjel duhátjagi guhkes rikkis ja earenoamáš musihkkaárbevierru. Dál dien militánta islámalaš leat oalát jávkadeamen, go čuoččuhit ahte muslimaid bassi girji korána gieldá musihka. Leat máŋga ovdamearkka mat duođaštit ahte vearjjuiduvvon stuibmesoalddáhat lea uhkidan musihkkáriid, ja máŋgasis leat soalddáhat duoguštan čuojanasaid seammás go čielgasit lea sidjiide dadjan ahte nuppes sii goddojit. – Dán ii báljo sáhtte jáhkkit dáhpáhuvvamis dálá čuvgejuvvon áiggis, ja Riddu Riđđu áigu dáistalit vai sátnefriddjavuohta musihkas sáhttá bisuhuvvot, ja mii doarjut musihkkáriid ja šuokŋadahkkiid geat uhkiduvvojit ja vásihit sensurerema, dadjá festiválahoavda Kirsti Lervoll.
Musihka ii sáhtte goassege jaskkodahttit
Tamikrest joavku vuođđuduvvui jagi 2006:s, ja sii orrot dál eksiillas Algerias. Doppe lea sis buoret vejolašvuohta dáistalit ja rahčat vuoigatvuođaideaset ovddas, ja politihkalaš soađi boađus lea dagahan ahte joavkku váldodoaibma dál lea soahtat musihka vehkiin, eaige vearjjuiguin. Albuma "Chatma" (2013), mii mearkkaša "oabbá", ", lea joavku hábmen muitun duostilis tuareg nissoniidda geat leat fuolahan – joavkku iežas sániid - "both their children's survival and the morals of their fathers and brothers". Joavku lea šlájaid ovttastus, mas ealas bluesrocka lea dovdomearkan. Sin poehtalaš ja čiekŋalis morálalaš dovduičuohcci teavsttat mat duođaid váikkuhit guldaleaddji. –Mun duođaid hirpmahuvvon go Tamikrest lea nákcen almmustahttán albuma, mii rámiduvvo miehta máilmmi, seammásgo sii ellet dákkár vártnuhis dilis, dadjá Lervoll. Son oaivvilda ahte Tamikrest beroštahttá buohkaid geat liikojit Tinariwen, mii lea eanet dovddus joavku, ja geat čuojahedje Riddu Riđus jagi 2010:s.
Ousmane Ag Mossa (the band leader of Tamikrest / Tamikrest joavkku jođiheaddji): «We are very happy to perform at Riddu Riddu Festival. It's important for us to see people fighting (and specialy fighting with the arts) to keep alive their culture. We are on the same way with Tamikrest. Mii leat ilus go beassat čuojahit Riddu Riđđu Festiválas. Midjiide lea dehálaš oaidnit olbmuid dáistaleamen (ja earenoamážiid dáidaga bakte) bisuheames ja seailluheames eallima kultuvrra. Mii dahkat dan seamma Tamikrest bakte.
Festivála jođus
Festivála au Désert – festivála sáttomeahcis – lei gitta 2012 rádjai stuorra, ivdnás geasuheaddji dáhpáhus Malis, mas Tuareg musihkka lei váldooassi. Guovllu ekstrema islámalaš joavkkut gal áigo bissehit visot musikála hámádagaid, ja veahkaválddálaš joavkkut uhkidedje festivála. Lágideaddjit gal eai obage leat vuollánan: «Ráfi áŋggirdanjoavku » mas lea mielde Mali musihkkarat leat váldán festivála mielde johtimii, ja lea dain johttán riikkain main lea dorvvolaš birrasat. Riddu Riđđu vásihii Sáttomeahccefestivála go dat čuojahedje Oslo World Music Festivála lávddis skábmamánus. –Doppe mii deaivvadeimmet Mali musihkkariiguin geat ledje vásihan garra goddinuhkádusaid, ja geat eai sáhtte máhccat ruovtturiikii almmá heaggavárálaččat hávváduvvot dahje goddot, muitala Lervoll. Tamikrest diŋgon Riddu Riđu festiválii lea buori ovttasbarggu boađus gaskal Riddu Riđu ja Oslo World.