“Films from the North” Riddu Riđđui
Riddu Riđđu festivála eamifilbmaprográmma ávvuda dán jagi 20-jagi. Eamifilbmaprográmmain lea vierru loktet ovdan eamifilbmadahkkiid ja filmmaid main lea eamifilbmafáddá, dávjá oanehisfilmma hámis. Dán jagi ávvudeami oktavuođas searvá Eurohpa stuorámus eamifilbmafestivála eará bures ásahuvvon kulturásahusain dán guovllus, Romssa riikkaidgaskasaš filbmafestiválain (TIFF). Dát guokte festivála leat ovttasbargan ollu jagiid, ja TIFF lea dán jagi oidnosis máŋgga sajis Riddu Riđđu prográmmaplánas, ja filbma- ja semináraprográmmain.
Filbmaberošteaddji guossit besset illudit oanehisfilbmaprográmmii "Film fra nord" maid TIFF lea kurateren, tihtteliiguin IVALU, Unborn Biru, The Land of Whispering Stars, ja Shaman's Apprentice.
TIFF festiválajođiheaddji, Lisa Hoen, illuda ovttasbargui:
- TIFF čájeha oanehis filmmaid Film fra nord-prográmmas mainleat álgoálbmogat fáddán. Dasa lassin čájehit mii šaŋŋerfilmma SLASH/BACK maid Nyla Innuksuk lea dahkan mas muhtin čaffadis nuorra Nunavut nieiddain lea váldorolla. Dát lea inuihtta science fiction filbma, ja ii leat go illudit oaidnit zombilágan jiekŋaguovžžaid ja bohccuid!
Riddu Riđđu festivála hoavda, Sajje Solbakk, lea gearggus ávvudit 20 jagi Eamifilmmáiguin:
- Mii diehtit ahte ollugiidda min geahččiide lea stuorimus illu beassat Nisga'a Longhouse sisa návddašit máŋggalágan eamifilmmaid. Jus lea juoga masa mii eat goassege dolkka, de leat dat eamiálbmot muitalusat maid gaskkustit čeahpes filbmadahkkit geain lea eamifilbma duogáš. Ovttasbargu TIFF:in oidno bures prográmmas dán jagi, ja lea illudahtti ávvudit Eamifilmmaid ovttas singuin!
Lassin filbmaprográmmii fállá Riddu Riđđu festivála viiddis prográmma olles bearrašii, ja nuvttá tealtágohttensaji festiválabáikkis. Bileahtat leat dál vuovdimassii www.riddu.no.