Festivála birra jagi!
Olbmot barget birra jagi duohtandahkat festiválavahku, mii lea dego Riddu Riđu finálafeasta.
Go Riddu Riđđu jagis 2009 oaččui našuvnnalaš guovddášfestivála stáhtusa de rivde maid eavttut, ja dan rájes lea festiválas leamaš birrajagi doaibma. Dat mearkkaša, ahte mii sáhttit, ja galgat, bargat dan ovdii ahte sámi- ja eamiálbmotkultuvra dahkkojuvvojit dovddusin olles jagi.
Vai sáhtašeimme doalahit stáhtusa dovdduseamos riikkaidgaskasaš eamiálbmotdáidaga lávdin de gáibida dat mis viiddis oktavuođaid fierpmádaga miehtá máilmmi. Riddu Riđđu bovdejuvvo máŋgasii máilmmi stuorimus eamiálbmotfestiválaide, ja min mihttun lea beassat iežamet fierpmádaga bakte dan dillái, ahte sáhttit ovddidit sámi dáiddáriid ja artisttaid muhtumiidda máilmmi deháleamos eamiálbmotlávddiide. Muhto Riddu Riđu sadji Eurohpá eanemus árvvusadnojuvvon lávdin máilmmi eamiálbmogiidda dagaha dan ahte máŋga artista sihtet beassát aiddo fal deike, min lávdái Gáivutnii. Máŋgasat maid loaiddastit Riddu Riđđu festiválas, ja muhtumiin min ovttasbargolávddiin. Čađa jagi mii oassálastit máŋgga lágidemiide, sihke Norggas ja olgoriikkain, ja dain mii ovdanbuktit sámi dáidaga ja kultuvrra.
Oslo World Music Festival lea okta dain deháleamos world music festiválain Eurohpás, ja mii leat hui ilus leahtit sin ovttasbargofestiválan. Oslo World festiválii mii leat ožžon dakkár artisttaid go Adjágas ja Niko Valkeapää, ja mii leat lágidan luohteságastallama golmma buolvva Gaup-bearrašiin, man Ánte Mihkkal Gaup jođihii. Dán jagi golggot- ja skábmamánu molsašumis ávvuda Oslo World 20 jagi, ja mii ovttasbargat dál njealját gearddi ovdanbuktit sámi musihkka doppe.
Maŋimuš golmma jagi lea Riddu Riđđu jahkásaččat lágidan ovttasbarggus Davviálbmogiid guovddážiin ja Ruošša eamiálbmotorgánain RAIPONiin konseartta Ruoššas. Min mielde dohko leat mátkkoštan Mari Boine, Skáidi, dánsenčájálmas Jorggáhallan (Elle Sofe Henriksen ja Semen Bolshunov) ja Adjágas. Sii leat doallan konsearttaid stuorra gávpogiin nugo Moskovas ja St. Petersburgas. Dasa lassin mii ovddidat sámi artisttaid iešguđetlágan eamiálbmotfestiválaide Ruoššas, dego Arctic Taimyr festiválii ja Alhalalay festiválii Kamčatkas.
Ođđaseamos lávdi, mainna Riddu Riđđu lea ásahan ovttasbargu lea Davvi-Norgga riemut. Geassemánu 24. b. mii presenteret Hášttás 18-jahkásaš Katarina Barruka. Son lei min diimmá nuorra dáiddár. Dalle son válddii Riddu-gehččiid stoarpmain, ja dál bessetge eanebat gullat ja vásihit dán nuorra ja čeahpes taleantta, geas orru leamen hui čuvges boahtteáigi.
Juos leaččat sáhkkii das maid mii bargat miehtá jagi de sáhtát čuovvut min neahttasiiddu, Facebooka ja Twittera bakte!