Ella Marie vuohččan soloartistan Riddu Riđđus

Ella Marie lea Sámi artista ja aktivista Deanus Finnmárkkus eret. Son lea leamaš ISÁK-joavkku njunnožis čieža jagi, ja lea rámiiduvvon su áŋgiris lávdepersovnnalašvuođa ja váimmolaš luohteovddideami ovddas. Dál álgá son soloartistan ja vuosttaš konsearta lea Riddu Riđđus suoidnemánus.

Ella Marie vásihii našuvnnalaš beaggima 2018:s, go vuittii Stjernekamp-gilvvu NRK:s. Son lea dan rájes geavahan jienas rahčat sámi vuoigatvuođaid ovddas ja máŋggaid jagiid bargan sámi guovlluid suodjalemiin. Dál lea son dohkkehuvvon oktan ovddimus aktivistan ja vuoigatvuođaáŋggirdeaddjin oppa Norggas.  

ISÁK-joavkkuin lea Ella Marie čuojahan ollu konsearttaid Riddu Riđđus, ja lea áigá juo olahan nástestáhtusa festiválagussiid gaskkas Olmmáivákkis. Bivnnut artisttas leat vuordámušat geassái:  

- Lean jáhkkemeahttun giitevaš go beasan álgit soloartistan lávddis mii lea mearkkašan nu ollu munnje. Mus leat lohkameahttun buorit muittut Riddu Riđđus, sihke guossin, eaktodáhtolažžan ja dieđusge artistan. Dál go galggan introduseret iežan soloartistan, de orro áibbas riekta dahkat dan Sámis, ja festiválas mii nu ollu jagiid lea lokten ovdan sámi jienaid. Mun illudan! Dadjá Ella Marie. 

Vaikko Ella Marie musihkas lea čielga sáttasátni dáruiduhttimis ja kulturmassima morašteamis, de lea su musihkka nana ávvudeapmi sámi vuostálastimis ja oktiigullevašvuođas. Poehtalaš ja láidesteaddji vugiiguin Ella Marie bidjá sániid ja nuohtaid bahča dovdduide maid ollu álgoálbmogat dovdet, geahččalit muhtun muddui luvvet sin bákčasiid. Dáinna lágiin Ella Marie bovde gehččiidis persovnnalaš ja oadjebas latnjii, gos Sámiid rikkis kulturárbi ja rámisvuohta lea guovddážis. 

Festiválajođiheaddji Sajje Solbakk lea guhká illudan almmuhit dán: 

Ella Marie lea čalmmustahttán iežas leat okta Sámi čielgaseamos ja deháleamos jienain – sihke musihkainis ja aktivismmain. Mii dovdat ahte dá lea áidnalunddot booken ja dovdat rámisvuođa go son doallá vuosttaš konsearttas soloartistan Riddu Riđđus. Šaddá hui erenoamáš beassat vásihit Ella Marie áibbas ođđa buktagiid máilmmi čábbámus birrasis! 

Ovdalaččas leaba artistat Mari Boine ja Emil Kárlsen duođaštuvvon geasi festiválaprográmmii.