Dán jagi nuorra dáiddárin Riddu Riđus
Aarni Pieski lea dán jagi nuorra dáiddár Riddu Riđus
Aarni Pieski (23) Ohcejogas ja Helssegis eret lea nammaduvvon Dán jagi nuorra dáiddárin Riddu Riđus. Pieski lea sámi multidáiddár, hárjánemiin lávdedáidagis, filmmain, girjjálašvuođas ja visuála dáidagis.
Dáiddadoaimmastis guorahallá Pieski dynamihka gaskal identitehta, historjjá ja gullevašvuođa, ja deattuha erenomážit bonju sámi geahččanguovllu. Pieski čalmmustahttá bonju sámi historjjá, mii unnán oidno sámi almmolašvuođas, ja lea veahkkin viiddideame ipmárdusa das maid sámi identitehta sáhttá siskkildit.
-Mun lean hui giitevaš dán dohkkeheamis. Vejolašvuohta nanusmahttit iežan dáiddalaš geavada ja báttiidan sámi ja eamiálbmot dáiddasuorgái lea munnje hui mávssolaš, dadjá Aarni Pieski ieš.
Festivála guossit besset juo dán jagi Riddu Riđus buorebut oahpásmuvvat dán jagi nuorra dáiddáriin. Dáiddárságastallama bokte ožžot guossit čiekŋudit Aarni dáiddadoibmii.
Sajje Solbakk, festiválajođiheaddji, lea movttet ođđa nammademiin:
- Aarni bargá surggiid rastá vugiin mii speadjalastá Sámi viidodaga ja girjáivuođa. Son čalmmustahttá muitalusaid ja geahččanguovlluid maid mii eanet dárbbašit, sihke sámi almmolašvuođas ja servodagas muđuige. Mii leat rámis nammadeamis ja illudit čuovvut Pieski ovdáneami boahtte jagi!
Jury ákkastallan:
“Pieski lea fuopmášahtti nanu ja čielga dáiddadoaimmainis mas historjámuitaleapmi lea guovddážis. Jury áigu loktet suomabeale Sámi geahččanguovllu ja vásáhusaid das go bajásšaddá sápmelažžan urbána oktavuođas guhkkin eret árbevirolaš sámi guovlluin. Dát lea dehálaš jietna mii unnán lea beaggán, ja maid mii dáhttut loktet.
Jury vásiha ahte su dáiddadoaibma lea sihke láddan ja maiddái garrasit ovdáneame, ja mii illudit čuovvut su barggu ja maiddái oaidnit movt sáhttá ovdánit ovttas Riddu Riđu fierpmádagain ja rámmaiguin.”
Jurys lea Sajje Solbakk, Erle Bårdsdatter Sæther ja Ann Cecilie Hætta, ovttas Musihkka- ja lávdedáida lávdegotti Bernt Bjørn, Knut Åserud ja Petra Laiti.
Riddu Riđđu taleantaprográmma
Dán jagi nuorra dáiddár lea Riddu Riđu taleantaprográmma, masa juohke jagi válljet ovtta nuorra sámi dáiddára ovddastit su dáiddadoaimma Riddu Riđu festiválaprográmmas ja birra jagi iežá doaluin maid Riddu Riđđu lea mielde lágideame. Lassin 25.000 ruvdnosaš stipendii čuovvu nammadeami maiddái orostallan Lásságámmis, Áillohaš-rohki dáiddárviesus. Aarni Pieski álggaha iežas jagi nuorra dáiddárin dán jagi Riddu Riđđu festiválas, ja joatká doaimma ElleMina Kuoljok Baer maŋis.
Talent Norge, Servodatlokten ja Lássagámmi dorjot Dán jagi nuorra dáiddár/Riddu sessions-doaimmaid.