Dá lea Riddu Riđu ođđa festiválajođiheaddji
Mii sáhttit dál iluin muitalit ahte Erle Bårdsdatter Sæther lea virgáduvvon ođđa festiválajođiheaddjin. Sæthera mii jo dovdat bures festiválas. Son bargá dál buvttadeaddjin Riddu Riđus ja lea ovdal leamaš sihke buvttadeaddjeveahkki ja okta festivála eaktodáhtolaš bargiin.
Festiválajođiheaddjevirggi mearreáigi lea njeallje jagi. Dálá festiválajođiheaddji Sajje Solbakk lea dál njealját ja maŋemus jagistis virggis, ja dán jagi festivála šaddáge su maŋemus festiválajođiheaddjin.
Festiválajođiheaddjin galgá Sætheris leat bajimus ovddasvástádus festivála dáiddalaš doaimmas, sihke bargiid ja eaktodáhtolaččaid hárrái. Lagas ovttasbarggus earáiguin hálddahusas, bargiiguin ja eamiálbmotdáiddáriiguin miehtá máilmmi galgá son ovdánahttit Riddu Riđu njunuš eamiálbmotfestiválan.
- Mun lean mearehis giitevaš luohttámuša ovddas beassat jođihit Riddu Riđđu Festivála dáiddalaš doaimma boahtte njeallje jagi. Festivála lea dehálaš oassi mu eallimis, ja dáppe mus leat leamašan muhtun mu garraseamos konseartavásáhusain ja dáppe lean vásihan ovddolaš deaivvademiid olbmuid gaskkas. Mun illudan iežan hámi laktit prográmmii ja organisašuvdnii, ja dieđusge maiddái leat min rámálmas bargiide jođiheaddjin, lohká ieš Sæther.
Sætheris lea lektoroahppu ja lea jagi lohkan eŋgelasgiela Oslo universitehtas. Son lea maiddái lohkan sámegiela álgodásis UiT – Norgga árktalaš universitehtas ja Giellasiiddas.
Lassin ohppui lea son viššalit bargan moanat sámi organisašuvnnas, nugo Noereh, IDJA – Sámi Club Night, Saemien Studeenth Oslovisnie ja Garmeres. Son lea ovdal bargan Natur ogUngdom guovllučállin, festiválajournalistan Festspillene i Nord-Norges ja vuosttaškonsuleantan UiT Sámi dutkamiid guovddážis. Jagi 2023 čakčamánu rájes lea son leamašan buvttadeaddjin Riddu Riđđus.
Riddu Riđđu stivrajođiheaddji, Bente Ovedie Skogvang, lea hui duhtavaš virgádemiin:
- Mun lea nu movttet go leat virgádan Erle Bårdsdatter alcceseamet ođđa festiválajođiheaddjin. Erle dovdá Riddu Riđu hirbmat bures iežas nanu barggu bokte buvttadeaddjin. Sus lea maiddái masteroahppu mii lea hui áššáigullevaš festivála jođiheaddjerollii. Illudan ovttasbargat suinna.
Erle álgá festivála veahkkejođiheaddjin miessemánu 1. b., oahpahallanáigodahkii ovdal goalmmolaččat váldá Solbakka saji čakčamánu 1. b.
Mii illudat čuovvut Erle boahttevaš njeallje jagi!