Burjáhtialaš ja mongolalaš ambient-popa Riddu Riđđui
Mii leat mearehis ilus go beassat Namgara ustibiiddámet sávvat bures boahtima fas Olmmáivággái!
Dan rájes go álge 2003:s lea Namgar darvehan guldaleddjiid miehtá máilmmi árbevirolaš burjáhtialaš ja mongolalaš musihkain seaguhuvvon seamma mađe pop -, jazz- ja ambient-oaiváduvvon jietnagovain. Namgaras lea áibbas čielga fuolkevuohta joavkkuide nugo Bel Cantoi ja Dead Can Dancei, muhto bisuha goitge nannosit iežas erenoamáš hámi.
Lávlu Namgar Lhasaranova guossoha goasii jáhkkemeahttun jietnadáiddu ja hálddašeami, go goasii távttas táktii nagoda lihkadit lávlunvugiid gaskkas. Sus lea maiddái duogážis hirbmat nanu ja ovttasdoaibmi joavku, mii maŋemus 2021-almmuheamis, Nayaan Navaas, duođas vuosehii mii sin siste lea. Eará sániiguin, áibbas erenoamáš dáhpáhus lea boađe boađi Riddu-guolbanii.
Riddu Riđđus lea leamaš illu beassat vásihit Namgara guossin moanat háve ja máŋga iešguđetlágán konstellašuvnnas. Dán jagi konsearta lea vuosttaš vejolašvuohta Riddu-álbmogis vásihit Namgara olles joavkkuin jagi 2013 Nordic Namgar nammasaš diŋgojuvvon buktaga maŋŋel.
“Mis lea ollu jagiid leamaš hállu bovdet Namgara ruovttoluotta Riddu Riđđui, muhto iešguđet ákkaid dihte lea leamašan váttis. Leat hirbmat movttegat go viimmat 2024:s nagodit dan. Dál lea Riddu-álbmogis duođas juoga masa galget illudit!”, dadjá festiválajođiheaddji Sajje Solbakk kommentáras.
Namgara kommentára: Riddu Riđđu lea deaivvadeapmi man guhká leat vuordán, olbmáiguin, rámálmas guldaleddjiiguin, rámálmas musihkain ja rámálmas birrasiin. Riddu Riđđu ilosmahttá eallima!