Buošši-bálkkašumi
Bivdit evttohusaid easkaálggahuvvon kulturbálkkašumi vuostáiváldiide
Riddu Riđđu ja Davviálbmogiid guovddáš juhket Buošši-bálkkašumi dán jagi Riddu Riđđus. Buošši-bálkkašupmi lea ođđa kulturbálkkašupmi mii addo olbmuide, joavkkuide dahje servviide geat leat dahkan positiivvalaš árjja čalmmustahttit mearrasámi kultuvrra ja giela; juogo daguideaset bokte dahje go leat ovdagovvan.
Bálkkašumi juolludeaddjit bivdet dál álbmogis evttohusaid bálkkašumi vuostáiváldiide. Olbmos dahje olbmuin ferte leat čanasteapmi Davvi-Romsii: Gáivutnii, Omasvutnii, Ivgui, Ráisii, Návutnii dahje Gálsii.
Davvi-Romssas lea buošši olmmoš gii lea čeahppi, áŋgir ja barggan.
Evttohusa aktan ákkastemiin sáddet maŋemusat geassemánu 1.b. dása: [email protected]
Sandra Márjá West, Riddu Riđđu festiválajođiheaddji, lea rámis almmustahttit áibbas ođđa kulturbálkkašumi:
- Hui oallugat geat leat ollu návccaid bidjan mearrasámi giela ja kultuvrra ealáskahttimii ja mii háliidit sin loktet oidnosii. Máilmmis leat ollu bálkkašumit, muhto stuorámus goargu lea go iežat álbmot gudnejahttá du. Sávvat dát sáhttá addit movtta daidda oallut buollisearaide geat bidjet ollu árjjaid min álbmoga boahtteáigái, ja dasa lassin leat min mearrasámi historjjá čalmmusteapmin.
Svein O. Leiros, Davviálbmogiid guovddáža beaivválaš jođiheaddji, illuda gudnejahttit guovllu mearkkašahtti kulturaktevrraid:
- Mii leat nu movttegat go leat nagodan ásahit dán bálkkašumi ovttas Riddu Riđđu Festiválain. Lea dehálaš čalmmustahttit mearrasámi kulturárbámet. Lea maiddái jáhkkemeahttun somá ahte vuoiti gudnejahttojuvvo Riddu Riđđus, min mearrasámi rámálmasas.