Álbmotgáibádus álbmogis

Rockajoavku Sator, oktan Olmmáivággilaččain Kent Norberg´in (Dalheim) guhte lea joavkku njunušolmmái, lea beroštahttán «beali giláža álbmogis» geat leat háliidan diŋgot joavkku čuojahit geasi festiválas.

Doarjjajoavku lea mearridan

Dievdu guhte lea álggahan Facebook-joavkku «Sator 2014 Riddu Riđđui» ja ieš musihkar ja rock’n’roll áŋggirdeaddji. Odd Isaksen lea guhka háliidan ahte Ruoŧa rockajoavku Sator galge čuojahit Riddu Riđu doaluin, ja mannán čavčča son ásahii Facebook-joavkku mas ulbmil lei iskat álbmoga beroštumi. –Mun jurddašin ahte Facebook lei buorre ja vuogas reaidu mainna lei vejolaš iskat leigo doarjja mu árvalussii ahte oažžut Sator Riddu Riđđui, ja doarjaga ožžon, dadjá Isaksen ja lea duhtavaš. Per Ivar Jensen gohčoda iežas eallilan punkar, guhte doarjjui álbmotgáibádusa ahte oažžut Sator´a Riddu Riđđui.  Son gal ii eahpitge manin: - Mii boaranat leat álot liikon Sator´a. Mun oahpásmuvven joavkkuin maŋŋil viiddis áŋgiruššama mii čađahuvvui Gáivuonas 80-logu loahpageahčen, ja das rájes lea mun leamašan sin doarjaleaddjin, dadjá Jensen.

Alla árvu

Oallugiin sis geat ledje mielde ásaheames Riddu-festivála lea ráhkislaš gaskavuohta Sator´ii. Lea vuosttažettiin joavku njunušolbmá Kent Norberg (Dalheim) dihte ahte nu ollugat Riddu Riđu berošteddjiin dorjot joavku. –Kent´a eadni lea Olmmáivákkis eret, ja buot geasseluomuid son lea golahan dáppe Olmmáivákkis, muitala Odd Isaksen, guhte ieš lea buorre ustit ja sogalaš Sator stuora nástin. –Jus áiggut Riddu Riđus čuojahit de dieđusge ii leat doarvái dušše leat Olmmáivákkis eret, muhto Sator lágida konsearttaid máŋggaid lávddiin Eurohpás ja iežaset musihkkasuorggis lea sis alla árvu– ja lea čielggas ahte sii leat doarvái čeahpit čuojahit Riddu lávddis, deattuha Isaksen

Rámida beroštumi

-Ii leat nu dávjá ahte mun ná sáhtán dadjat, muhto dán oktavuođas sáhtán dadjat ahte lean beare nuorra  ipmirdeames man stuoris Sator joavku lea sidjiide geat juo álggu rájes dáistaledje festivála ovddas, dadjá festiválahoavda Kirsti Lervoll. Lervoll deattuha ahte son čielgasit lea ipmirdan ahte Sator doarjaleaddjit, máŋggaid riikkain, adnet Sator alla árvvolaš joavkun. Musihkkavideoid maid MTV lea čuojahan ja máŋga rámiduvvon musihkkačoakkáldagaid vuođul de son čielgasit doarju Sator-diŋgoma. –Dat mii lea hui earenomáš dáinna diŋgojumiin lea stuorra beroštupmi maid olbmuid gaskkas leat oaidnán, ja measta juo gáibidan ahte Sator galgá beassat čuojahit Riddu Riđus. Juste na bargat lea earenoamáš «Olmmáivággilaš» bargovuohki, mieđiha Lervoll.