Ceavzilis festivála

Riddusletta

Riddu Riđđu festivála lei vuosttaš festiválaid searvvis Norggas mii dohkkehuvvui birasčuovgadoardnan (2004). Dál mii leat ođđasit dohkkehuvvon ja mii leat dál bidjan alcceseamet mihttun šaddat Norgga buoremus birasfestiválan – ja dan mii sávvat ahte DON veahkehat min olahit dál 2019 Riddu Riđus!

Mii háliidit čájehit servodatovddasvástádusa dan bokte ahte leat diehtomielalaččat mot festivála váikkuha olbmuide, báikkálaš servodahkii ja birrasii. Juohke jagi mii buoridit doabbariid sirrendási ja oastit eanet birasdohkkehuvvon gálvvuid. Mii gávppašit eanas báikkálaččat, ja guossohit nu olu báikkálaš biepmu go vejolaš.  

Mii ávžžuhit gussiid sirret doabbariid ja mátkkoštit kollektiiva fievrruiguin festiválii. Mii mávssihit birasvearu biillaid orusteami ovddas. Buot bargit, nuoraidprográmma Nuorat ja eaktodáhtolaš bargit ožžot máhcastanguvssi mainna oažžu nuvttá gáfe olles festiválaáiggi. Dan mii dahkat eastadan dihte olu bábergohpuid geavaheamis.

Mii eat vuovdde Coca-Cola festiválas. Dan mii leat diehtomielalaččat válljen cuiggodan dihte Coca-Cola Companya čázi privatiserenproseassa mii áitá álgoálbmogiid vejolašvuođa oažžut juhkančázi. Guossit ožžot biepmu lihtiin mat leat dahkkon pálbmalasttain, ja boradanneavvuid maid sáhttá 100% suddadit lundui. Maiddái bargoveaga ja eaktodáhtolaš bargiid biebmu guossohuvvo seammalágan ávdnasiin. Bargoveaga niesti páhkkejuvvo báberbussiide, maidda ovdal aniimet plastihkkabussiid. Buvddas vuovdit birasseasti T-báiddiid ja gahperbuseriid.   

Dan jagi mii leat maid unnidan deaddiluvvon plakáhtaid. Mis leat diehtojuohkingalbbat maid mii geavahit juoge jagi, ja mii garvit čáliheames báhpiriid. Mii leat maiddái ráhkadan dávvirbáŋkku hehtten dihte ahte divrras ja dehálaš dávvirat eai jávkka. Go bures plánet artisttaid ja gussiid fievrrideami de eat dárbbat vuodjit nu olu Romssa ja Olmmáivákki gaskkas.

Festiválas lea buorre ovttasbargu Avfallsservice AS:in, geat veahkehit min gelbbolašvuođain mot lea buoremus gieđahallat doabbariid festiválabotta ja maŋŋel festivála. Dasa lassin lea Riddu Riđđu miellahttu Visit Lyngenfjordas, geat leat dohkkehuvvon ceavzilis mátkebáikin. Loga eambbo ortnega birra dás. 

Dán jagi boahtá Naturvernforbundet (luonddugáhttenlihttu) geahčadit min birasgáhttenbarggu festiválabotta. Sis leat sierra birasverddet geat veahkehit ja muitalit doappargieđahallama birra.  

Min birasgáhttenbarggu ulbmilat boahtteáigái:  

  • Unnidit girdiid ja biillaid geavaheami
  • Eanet sirret plastihkaid  
  • Oažžut eanet birasdohkkehuvvon lágideddjiid ja ekologalaš biepmuid
  • Álkidit doappargieđahallama festivála gussiide festiválašiljus, nu ahte šaddá vel beaktileabbo 
  • Báberkeahtes kánturdoaibma