Mii leat guhká niegadan dán - ja dál sáhttit dieđihit ahte Elisapie čuojaha Riddu Riđđus 2026:s! 

Elisapie lea okta máilmmi njunuš álgoálbmotartisttain, dovddus iežas gievrras ja earenoamáš jienain. Son lea riegádan ja bajásšaddan Salluitis, Nunavikas - unna gilážis nu guhkkin davvin Quebecas ahte dohko beassá dušše girdiin. Nuorravuođas son čuojahii iežas fulkkiiguin dovddus inuihttarockjoavkkus Sugluk, ovdal go fárrii Montrealii ja álggahii solokarrieara mii lea dahkan su okta dain deháleamos jienain kanádalaš musihkas - ja viidáseappot. 

Su musihkka seaguha inuihttagiela ja identitehta álbmot-, indie- ja ođđaáigásaš ovdanbuktimiiguin. Dat govviduvvo ilolažžan, čáppan ja hui persovnnalažžan. Su skearru The Ballad of the Runaway Girl (2018) oaččui buriid árvvoštallamiid, vuittii bálkkašumiid ja doalvvui su lávddiide nugo Tiny Desk, SummerStage Central Parkas, ja konsearttaide Orchester Métropolitain:in Yannick Nézet-Séguin jođihemiin. 

Mii leat hirbmat rámis beassat sávvat Elisapie buresboahtima Gáivutnii ja Riddu Riđđui 2026 - dát šaddá eahpitkeahttá konsearta man birra hupmat ja muitit guhká!