Riddu Riđđu lea gearggus almmostahttit jagi 2019 vuosttaš artisttaid

Riddu Riđđu lea gearggus almmostahttit jagi 2019 vuosttaš artisttaid. Festivála, mas diehtit ahte stuora oassi váldolávddi artisttain lávejit leat nissonat,  dat ii dán ge jagi beahte! Dál lea festivála čohkken golmma buolvva nissoniid ja eamiálbmotnásttiid: Buffy Sainte-Marie, Tanya Tagaqa ja Maxida Märaka.  Fárrolaga galget ráhkadit áibbas erenoamáš diŋgojuvvon buktaga.

“Ollu jagiid leat niegadan nagodit juste dán! Dát lea duođas niehkojoavku mas leat eamiálbmotdronnegat! Dáidá borggistit aktivismma, vuosttaldeami ja dáistalanmovtta go dát golmmas ovttas hábmejit dan mii šaddá boahtte jagi “bággu-oaidnit”-konsearta!” dadjá festiválajođiheaddji Sandra Márjá West.

Buot golbmasis lea stuora servodatberoštupmi mii vuhtto musihkas maid ráhkadit. Sii leat beaggán eahpevuoiggalašvuođa vuosttaldeamis ja leat nanu jienat eamiálbmogiid dilálašvuođa čalmmustahttimis. 

Kanadalaš Buffy Sainte-Marie lea leamašan artistan guhtta logijagi ja lea sihke hilgojuvvon ja rámiduvvon. Su lávlagiid leat beakkálmasat nugo Janis Joplin ja Elvis Presley čuojahan ja bádden. Son sakka berošta eamiálbmotvuoigatvuođain, luonddus ja pasifismmas. Vuosttaldanlávlagat leat dahkan stuora oasi su artistakarriearas ja leatge ággan manin su muhtin áiggi hilgo.

Festiválajođiheaddji Sandra Márjá West lohká; “Buffy Sainte-Marie lea máinnolmas, ja sus lea leamašan stuora mearkkašupmi Riddu Riđđui. Su doarjaga haga ii livččii festivála unna mearrasámi servodagažis Gáivuonas leamašan das gos odne lea; eamiálbmotmusihkkii njunuš lávdin. Buffy lei Riddu Riđđus jagiin 2009 ja 2013, ja leat guhka sávvan su máhccat festiválii. Dát šaddá vuosttaš diŋgojuvvon konsearta maid dahká fárrolaga sámi artisttaiguin.”

Tanya Tagaq lea bálkkašuvvon inuihtta čottalávlu gii boahtá Iqaluktuutiaqis Kanadas. Sus lea sierralágán jietnamálle ja geahččaladdá ovttastit ođđamállet ja árbevirolaš musihkkahámiid lávdečájálmasas mas bávká vel. Tanya lea stuora áŋggaštusain eamiálbmotvuoigatvuođaid ja árbevieruid suodjaleaddji Kanadas.

“Tanya čuojahii Riddu Riđđus jagis 2009 ja hirpmahuhtii Riddu-gehččiid hirbmadit. Tanya lea issoras čaffat ja su cealkámuš lea čielggas dego ája. Dát šaddá eamiálbmogiid birgennávccaid ávvudeapmin ja čuorvvusin ahte ain joatkkit” dadjá Sandra Márjá West.  

Maxida Märak Johkamohkis, Ruoŧas, lea soahpameahttun vuosttaldanjuoigi gii bures lea oidnon dáistalemiin ruvkedoaimmaid vuostá Sámis. Lea beaggán go rehálaš ja politihkalaš sániidisguin dieđiha dávjá «beare ollu» baiccago beare unnán.  Maxida Märak bargá eanemus hip hopa siskkobealde, muhto laktá maiddái juoigama musihkkii.

“Maxidas lea rámálmas jietna ja lea čeahpes juoigi. Seammás lea son maid oalle garat, iige garvve čájeheamis suorpma máilbmái” lohká Sandra Márjá West.

“Diŋgojuvvon buvtta galgá fátmmastit eamiálbmogiid aktasaš dáistaleami eksisterenrievtti ovddas ja historjámet dohkkeheami ovddas, dan vuođul movt dán golmma buolvvas oidnet dan. Šaddá vásáhus mii gal ii vajálduva!” cealká festiválajođiheaddji Sandra Márjá West.