Resirkulert gearggus dán jagi Riddu Riđđu festiválii
Oallugat leat sávvan Resirkulerta máhccat Riddulávdái. Dál leat sii dás fas ja lohpidit vuosttaš geardde čuojahit ollu lávlagiid geasi festiválas.
Čuojahanmovttaineaset ja čehppodagaineaset leat Resirkulert-joavkkus ožžon ollu beroštumi dan rájes go álge jagis 2012. Čakčat luite vuorddálmas vuosttašskearruset "Du snakke for dæ sjøl", mainna oalát doalvvuhedje árvvoštalliid.
Sihke surrealisttalaš ja duođalaš teavsttaiguin, seaguhuvvon dánsumii soahppevaš illu-ritmmaiguin ja ráfálaš šuoŋaiguin, lea joavku hábmen sierra suorggi dárogielat musihkkaduovdagii. Lávlu ja omasvuotnalaš, Emil Karlsen, lea vuosihan ahte lea maiddái čeahpes juoigi, vaikko leage oalle nuorra, ja sus lea garra dáhttu iežas sámi duogáža nannet. Resirkulert lohpida luođi nai gullot Riddu Riđđu lávddis dán jagi ja lávlu Karlsen dadjá ieš; "Mu vuosttaš deaivvadeapmi juoigamiin lei unnin Riddufestiválas. Dađi mielde go jagit vásse, de mu juoiganberoštupmi lassánii, ja maŋemus jagi leat mus leamašan ollu láidesteaddjit ja oahpaheaddjit geaid sáhtán giitit go lean beassan čiekŋudit dán suorggis. Riddus áiggun juoigat áddján. Son lea álo dego áhčči leamašan munnje ja lea máŋgga dáfus ain nu. Gii bat vel buorebut ánssášivččii luođi? Ja de lea maiddái suohtas sáhttit rámidit soapmása dan bottu go lea eallime, iige duššo maŋŋil su áiggi dáppe".
Joavku lea gulustuvvon go dollet eallasis live-čuojahemiid main fargga guldaleaddjit leat searvvis lávlumin ja ribahit molkegoahtit veaháš eanet go duššo rockejuolggi. Ovdal geasi luitet vel lasi ođđa musihka, ja duhtavaš festiválajođiheaddji Karoline Trollvik dadjá; «Issoras hávski lea beassat booket dákkár báikkálaš joavkku dego Resirkulert, mii lea nanusmuvvan ja sajáiduvvon oanehis áiggis. Dáin bártniin lea iešluohttámuš ja ráhkadit lávlagiid mat gaskkustit buori ja maidda lea álki liikostit. Árvidan oallugat leat erenoamáš movttegat daningo Resirkulert máhccá min lusa, sii leat suoládan ollu váimmuid Davvi-Romssas ja ovddastit min mearrasámi kultuvrra báras ládje».
Resirkulert Youtubes: https://www.youtube.com/channel/UCttqGdjO-8jlcekRVP4bcsA