Ghana stuora popnásti Riddu Riđđui

Wiyaala, gii máiddái beaggá “Afrihkká nuorra ledjon”-namain, dáidá visot labmudit Riddu-gehččiid afro-popainis mii seaguhuvvo alvvalaš dánsumin ja čielga movttain.

 

Ghanalaš Wiyaala buohtastahttojuvvo beakkálmasaiguin nugo Grace Jonesiin ja Angelique Kidjoin. Su musihkka lea oarjeafrihkkálaš ritmmaid ja popa ovttastus, masa addá heakka rámálmas ja árjjálaš lávdečájálmasain. Lea beaggán nagodit vel ceaggámus geahččige oažžut dánsut ja moddját.   

“Jáhkán gehččiid ráhkásmuvvat Wiyaalai! Jus son ii nagot dánssuhit olles Riddu-guolbana, de gal ii oktage nagot!” dadjá festiváljođiheaddji Sandra Márjá West.

Wiyaala lávlu eatnigiellasis, Sissala-gillii, dávjá ovttas eŋgelasgielain. Ovddasta áššiid mat gusket nissoniid duolbmamii ja illasteapmái, nugo vuolledábiid čuohppamii ja mánáid náitimii. Son sávvá ahte su lihkostuvvan lea inspirašuvdnan nieiddaide ja ahte sii iežaset eallimiin galget ieža beassat mearrádusaid dahkat.

“Wiyaala lea riegádan artistan ja lea kulas ovdagovva nuorra nissoniida miehtá máilmmi!” lohká festiválajođiheaddji Sandra Márjá West.

Ovdalaččas leat jo Buffy Sainte-Marie, Tanya Tagaq, Maxida Märak ja ISÁK duođaštan ahte bohtet festiválii.