Beakkán joavku Violet Road čuojaha dán jagi Riddu Riđus.
Violet Road, mii dáidá leat okta Norgga olmmošeaddjámus musihkkajoavkkuin, čuojaha fas iežaset ruovttubáikkis Riddu Riđu festiválas, dieđiha festivála preassadieđáhusastit.
Olusat oaivvildit dán joavkku leat oktan riikka buoremus live-joavkun, sis leat ge radiohitat dego «Can You Hear The Morning Singing», «Face of the Moon» ja «Good Girls».
Albuma «Back to the Roadshow» lei 2014:s okta Sony Music skearrofitnodaga eanemus vuvdon CD:in. Gos ihkinassii joavku ain čuojaheš, de bileahtat visot vuvdojit ja sin musihkat čuojahuvvojit diibmoviissaid radios.
– Violet Road lea livejoavku man buohkat háliidit gullat! Mun vuorddán olusiid lávlestit go joavku de lávke Riddulávdái dán geasi, dadjá Riddu Riđu festiválajođiheaddji Karoline Trollvik.
«Lindmo» talkshow-prográmmas NRK:s lea joavku cealkán ahte Riddu Riđđu lei sidjiide deháleamos arena go galge oažžut positiiva áddejumi iežaset sámi identitehtas ja gullevašvuođas. Sii hálle maiddái dáruiduhttinpolitihkas ja mo Riddu Riđđu lea váikkuhan dasa ahte sámi čeavláivuohta lea fas ilbman.
– Violet Road leat duođaid hui buorit ambassadevrrat sámevuođa ja Gáivuona ovddas. Go leat rápmásat ruovttubáikki dihtii, cogget gávtti ja ovddastit sámevuođa positiivan, de dat sáhttá mielddisbuktit ahte eambbosat dustet čájehit sámevuođaset, dadjá festiválajođiheaddji.
– Jus mis lea lihkku, de soaitit beassat vásihit maŋŋil-konseartta vel Ridduguolbanis, mas gaskaijabeaivváš vel duogážis báitá. Rundberg-bearrašis lea fásta sadji campas, ja doppe leat jagiid čađa leamaš erenoamáš jam-čuojaheamit. Herman Rundberg lea ovdal lohkan Ridducampa leat buoremus feastacampan olles riikkas, ja ahte suohttasat vugiin oahpásnuvvat ođđa olbmuide ii báljo gávnna, muitala Trollvik.
Ovdalaččas lea festivála jo almmuhan ahte Ana Tijoux, Kitok, Slincraze,Hanggai, Northern Soul Simone Grøttein ja Herman Rundbergain, Ylva, Sondre Justad, Sofia Jannok ja Marja Mortensson čuojahit dán geasi Riddu Riđus. Festivála lágiduvvo Olmmáivákkis suoidnemánu 13.-17 beivviid