Beakkálmas Riddui

"Buohkat" leat oaidnán video mas Jon Henrik Fjällgren juoigá YouTubes. Geassái sáhtát su oaidnit Riddu Riđus.

Bures vuostáiváldon

Mánu áigi olles Sápmi beasai oaidnit ja oahpásmuvvat lullisápmelaččain Jon Henrik Fjällgren´ain go YouTube-video juhkkojuvvui sosiála mediain. – Lea čielggas ahte Riddu Riđđu láhče lávdesaji Fjällgrenii, go son lea dat sámi artista gean buohkat háliidit vásihit ja oaidnit albma ilmmis dál, dadjá festiválahoavda Kirsti Lervoll, guhte lea hui duhtavaš diŋgojumiin. Mun illudan čuojahit Riddu Riđus, man birra lean gullan nu ollu buriid ságaid, dadjá Jon Henrik Fjällgren.

Guoimmuhii buohkaid

26 jahkásaš Jon Henrik Fjällgren lea boazosápmelaš Mihten  guovllus Ruoŧas eret. Son lea ovdal čuojahan márkosámi festiválas Márkomeanus, ja šattai duođaid dovddusin dalle go Talang Ruoŧŧa (“norgga taleanttat" sullasaš lágideapmi Ruoŧas) almmuhii video ovtta su luđiin váile 4 vahkku áigi. Son duođai beaggigođii sihke Ruoŧas ja Norggas, ja dán video leat juo badjel miljovnna olbmo oaidnán ja earáiguin juogadan. – Mun in dieđe leango vel dan ipmirdan, lea nu ollu ahte lea váttis ipmirdit, dadjá Fjällgren.

Lullisámi šiella

Festiválahoavda Lervoll dadjá ahte lea earenoamáš illudahtti ahte lullisámi luohti oažžu ollu fuomášumi, Fjällgren attáldagaid bakte. –Lullisámi luohti lea hárvves ja earenoamáš vásáhus, ja dan maid Fjällgren ovddida iežas luđiiguin ja musihkain riggodahttá min buohkaid, dadjá Lervoll. Son gal ii eahpit gos sámit leat gávdnamis suoidnemánu nuppi vahkkoloahpa: -Mun dieđán ahte mii dáinna diŋgojumiin ollašuhttit oallugiid sávaldaga, ja imaš livččii jus Riddu Riđđu ii oaččut Sámis stuorra beakkálmasaid deike, dadjá Lervoll.