Amanda Delara 2018 Riddu Riđđui
19 jahkásaš Amanda Delare lei dego ráinnas vahca mii ilmmai norgga popmáilbmái ja šattai fargga buohkaid čađačalmmagin. Go luittii vuosttašsiŋŋela «Paper Paper», de bijai P3 su A-listtui ja lávlaga leat čuojahan badjel miljovnna gearddi Spotifys. Beakkán «Skam»-TV-ráiddus čuojahedje Amanda persovnnalaš covera Karpe Diema «Gunerius»-lávlagis ja dat hirbmosit ovddidii su karrieara.
Bajásšattadettiin váillahii Amanda ovdagovaid main oinnii sullasašvuođaid. Danin lea dál hui diđolaš makkár sajádat sus alddis lea unnitloguálbmotnuoraid guovdu. Háliida addit daidda doaivaga ahte nagodit juste maid háliidit, vaikko vel gulletge unnitloguálbmogii. Su ođđaseamos lávlla «New Generation» guovdilastáge juste iežas buolvva ja sávvá ahte movttiidahttá «šalddiid hukset, ráhkisvuođa juohkit ja iežas ráhkistit.»
19-jahkásaš, Nesas Romerikes eret, árrat čuojahišgođii piano ja maŋŋel fuomášii ahte háliida ieš ráhkadišgoahtit musihka. Ovddeš Nico & Vinz-joavku fuomášii taleantta go lei ráhkadan coverlávlagiid ja almmuhan musihka sosiála mediaijain, ja válde su iežaset indie label GR:OW Records háldui. Su musihkka lea sevdnjes pop, RnB ja eletronika seaguhus ja teavsttain lea politihkalaš vuoitinvuoibmi. Amanda leat dadjan leat norgga Lorde, M.I.A ja Sia, muhto iránalaš duogážiinnis hábme iežaslágán jietnagova.
Odne álgá boahtte geasi ebmomus festiválavásáhussii bileahttavuovdin. Sáhtát háhkat bileahta hui buori haddái gitta 31.12.17 rádjái.