You are here

Bargguid gávnnat

Bargguid gávnnat

Mánáidfestivála: Riddu Riđđu áigge doallat fiinna mánáidfestivála, mas leat máŋggat doaimmat, čájáhusat ja konseartat mánáide gaskal 3-13 jagi. Dáppe dárbbašit eaktodáhtolaččaid geat liikojit leat mánáiguin ovttas ja geat máhttet fuobmát suohtas hommáid singuin bargat ovttas. Mii gáibidit gustovaš duođaštusa politiijas  jus galggat bargat eaktodáhtolažžan min mánáidfestiválas.

Info: Infos šattat vuosttas olmmožin geainna festivála guossit deaivvadit, nuba lea dehálaš ahte dus lea govda modji ja buorre dáhttu bálvalandoaimmaide. Bargui gullá oahpistit ja juohkit dieđu min gussiide go sii juoidá váillahit. Dát bargu heive bures sidjiide, geat dovdet juo ovdalis festivála.

Biras: Riddu Riđđu festivála lea ožžon birassertifikáhta. Eaktodáhtolaš birasbargiin lea sierra ovddasvástádus fuolahit das, ahte festivála guossit sirrejit bázahasaid sierra ávdnasiid mielde ja bidjet daid rievttes lihtiide. Bargi ieš maid doallá festivála guovllu čáppisin ja čorgadin.

Huksen/njeaidin: Leat olu áššit mat galget rivttes sadjái ovdal festivála ja galget gergejuvvot válmmašin festiválii. Deike dárbbašit bargguide hárjánan olbmuid, geat liikojit vástidit hástalusaide. Juos don vel máhtát snihkket, de dat de lea dutnje stuorra ovdun!

Kioska/gáffevuovdin: Mis leat máŋga vuovdinsaji festiválasajis, leat kioskkat ja gáfestallansajit. Buorre juos dus lea vásáhus ruhtagieđahallamis, muhto dárbbu mielde mii oahpistit dán bargui. Lea maid dehálaš ahte don liikot olbmuiguin bargat, leat čorgat ja álohii buorre mielas.

Dorvvolašvuohta: Eaktodáhtolačča váldobargun dorvvolašvuođa doaimmas lea fuolahit das, ahte festivála guossit fidnejit dorvvolaš ja fiinna vásáhusa festiválas. Mii dárbbašit olbmuid, geat sáhttet bargat nu beaiveváktan go idjaváktange. Juos leat veahkkái, njuovžil ja moddjái, de leat rievttes olmmoš dán hommái.

Reaidobáŋku/basadansaji vákta: Reaidobáŋku lea vuorká gos mis leat buot reaiddut ja rusttegat, maid mii atnit ovdal festivála ja dan áigge. Dáppe dárbbašit vásttolaš ja čorges olbmuid, geat veahkehit doallat ortnegis visot diŋggaid maid bargit váldet olggos ja go buktet daid fas ruovttoluotta vuorkái. Basadansaji váktan don válddát vuostá gussiin bileahtaid go galget basadit rišu vuolde guhkes festivála beivviid maŋŋá. Álkes ruhtagieđahallan ja oanehis váktavuorut.

Eaktodáhtolaččaid dealtá: Váffeliid ja juhkamuša haga sáŋgárat eai nagot! Eaktodáhtolaš bargiid dealttás mii dárbbašit soapmása guhte váldá erenoamáš buori vára min sáŋgáriin, eaktodáhtus bargiin! Dáppe don doaimmat nu ahte eaktodáhtolaš bargiin lea suohtas bargat, dáppe sii ožžot biepmu bottuid áigge ja don leat mielde huksemin buori vuoiŋŋa ja movtta eaktodálaččaid dealtái.

Akkrediteren: Bargun lea váldit vuostá akkrediteremiid omd. preassas dahje gussiin, geat galget beassat sisa festiválii. Dáppe mii dárbbašit olbmuid geat máhttet bures geavahit datamášeniid, ja sii mielas bálvalit olbmuid. Juos don leat ilolaš ja moddjái ja geasuhat olbmuid de don leat jur rievttes olmmoš dása!

Biebmofállan: Dáppe lea bargun málestit ja vuovdit biepmu festivála gussiide geain lea borranmiella. Don oažžut oahpisteami dáid bargguide ja mo daid dahkat. Dáppe lea gaskkohagaid garra bargoleaktu ja don gártat bargat olu čuožžat.

Bára: Báras lea bargu njoarrat ja guossohit vuollaga, viinna ja bruvssa. Deike dárbbašit eaktodáhtolaččaid geat leat badjel 18 jagi, geat leat movttegat, gierdevaččat ja geat leat doaimmalaččat ja loktet bures go lea veaháš hušša.

Akkrediteren/bileahtat: Akkrediteren/bileahtat: Akkrediteremis lea dus ovddasvástádus sisačállit ja akkrediteret gussiid geat eai galgga máksit. Bileahttavuovdimis vuostáiválddát gussiid geat galget oastit bileahtaid dahje lonuhit bileahta festiválagiehtabáttiin. Dáppe fertet hárjánan PC atnit barggus, beroštit vuogádahttimis ja liikot veahkehit gussiid.

Govven/filbmen: Háliidit vuosihit min festivála áibbas iešlágán vuoiŋŋa. Danin dárbbašit du, guhte liikot darvehit dieid erenoamáš bottožiid juogo filbmii dahje govvii. Oallugat sis, geat álge eaktodáhtolaš govvejeaddjin Riddu Riđđus, leat ožžon ollu beroštumi govvejeaddjin maŋŋil.